Babcia i Dziadek

Henryk Sienkiewic

"Dziadek Ludwik"


Trzynostego  siyrpnia,  w  tysiąc  dziewiynćset  trzecim  roku
urodzioł sie, równo sto lot temu, dziadek Ludwik Sobczyk
kolosalny  filor  mojego  niyłokreślonego  dzieciństwa
i  modości  nyndznyj,  niewymownyj  i  głupiyj

na  mały  uroczystości,  a  w  sumie  była  nos  piątka
garść  wspomniyń  ło  nim  próbowoł  żech  wywołać
ale  zawsze  schodzioło  na  –  z  wakacyjny  promocji  bilety
na  tramwaj,  podróże  do  jakichś  gupich  paryży

emancypacja  kobiyt  we  właśnie  minionym  stuleciu
albo  na  Jona  –  znacznie  świyższego  niyboszczyka!
– upał  boł  niymiłosierny, zajadali my mamine ciasta
żodyn – co dziwne, nawet Bernad – keliszka gorzoły nie chcioł  

dziadek  boł  pracoholik,  łod  rana  do  nocy  i  do  –  śmierci
fachowiec  łod  elektryki  i  innych  przydatnych  fachów
głód, światowe wojny, powstania, faszyzm, komuna przeżoł
z pruskom dyscyplinom, nic dlo siebie, nigdy też chyba nie marzoł

czuły dlo wnuka w kołysce, u starszego narzekoł na wszysko
powstaniec, a potem germanofil – „łojcom sie Polski zachciało!”
na wieczor pod snopym lampy encyklopedia i krzyżówka
i dwa cukerki z czytaniem składu surowcowego z papiyrka

wiync pomału z naszych serc i pamiynci emigruje stary dziadek
łopuścioł nos wszystkich już siedymnoście wiosyn tymu
ale w nocy mi sie przyśnioł w koszmarze pogmotwanym
a pieronami łobudzony pytoł żech – czy to łon wyrywo drzewa?!


"Babcia – litania pytań"


dużo tych szaców przed dziadkym
kaj wstawiała miynso niy mając lodówki
w kery chałpie w chropocowie sie urodzioła
czymu barzi kochała syna łod córki

jej lalki ło świtaniu życia
dojrzywanie i smak chleba z trocin
piyrwsze zakochanie ty staruszki
pierwszo kryka dziołszki

czymu niy chciała zoboczyć nawet
roz gór krakowa morza
jak móg ji wystarczać ino Dom
w takim mieście sklepy jedzynie
dobro gospodyni caryca miyndzy izbom a kuchniom

poniyważ nie było mi dane zostać
mediewistom albo szpecym łod upadku cesarstwa
jeżech tropicielym spraw tak istotnych
zamęczom mama wujka w krąglutki
babciny gyburstag

i jemy daktyle bez pestek
słodke i miynke jak krówki